بيبو: شو عم تحضري بها الأيام على التلفزيون لك قنقوش ؟؟
قنقوش: ليش فيه غير المسلسلات التركية اللي ما فيه محطة عربية إلا وعم تشغل الشعب العربي بحكياتها.
بيبو: يلعن ها الحالة.
قنقوش: اييييه .. يا ماأحلاها أيام المسلسلات التركية .. شكلك ما عم بتابع تلفزيون بها الأيام ؟؟
بيبو: ليش شو فيه شي جديد .. استشهد البطل الخارق مراد علم دار ؟؟
قنقوش: لك ياريت
بيبو: لكن شو صار؟؟
قنقوش: مبارح القناة الرائدة الـ mbc والسبَّاقة لضخ الفلسفة التركية بعقول الشعب العربي فاجأتنا بإنجازتها بأول السنة وعرضت أول فيلم هندي مدبلج للغة العربية باللهجة الخليجة.
بيبو: هه هه هه
قنقوش: ليش عم تضحك؟؟
بيبو: والله عم اتخيل لك قنقوش كيف حسناوات الهند عم يحكوا خليجي!!!!
قنقوش: الله يسترنا على نهاية السنة ما يجيبولنا مسلسلات إسرائيلة مدبلجة باللهجة المصرية ويقعد الشعب العربي فاتح تمو وشاطح بعقلو وهوي بيتفرج على الإسرائيليين وبيصفقلن.
قولكون بتصير ما!!؟؟
ـــــــــــــــــــــــــــــــــــــــــــــــــــــــــــــــ
يشبهها :
16تعليق
Comments feed for this article
جانفي 16, 2010 في 2:33 م
Farah Batarneh
مرحبا
انا مبارح بالفعل صدمت باالمسلسلات الهندي اللي عم تتدبلج للخليجي !!!
و صدمت أكثر بمسلسلات أمريكية تتدبلج للسورية !!!
يعني طبلونا و جننونا بالتركي .. و قرروا يزيدوةا هالشعوب الفاضية جنان .. فدبلجولهم الاميكي و الهندي ..
لا حول ولا قوة الا بالله .. !!!
و جوابا ع سؤالك .. طبعا بتصير !! و بغير بلاد العرب ما حتصير !!!! و بالقريب العاجل كمان !!!!
جانفي 16, 2010 في 3:45 م
walid
إنتظري قليلاً يا آنستي … عندما تتم دبلجة الأفلام الصينية للعربية الخليجية … و خاصة صراخ أبطال الكونغ فو …. شي ناهي تمام …
تحيات طيبة
جانفي 16, 2010 في 10:19 م
لبنى
حلو كتير
بس بتصير يا بيبو بكرا بنتفرج على كوهين و بنشفق عليه و على حبيبته و يمكن حبيبه ما هي القصة ممكن تكبر اكتر و اكتر
و ساعتها بيطلعوا ناس بيحكوا شو فيها لازم ننفتح على ثقافة الاخر بس هالمرة مش فتح افواه
بلا مؤاخذة
مو عارفة ليش بقدر اقرا مدونتك و علق فيها مع انو حتى مدونتي ما بقدر فوتها لعطل فني بالكمبيوتر
حتى الايميل نفس الشي بقدر اقرا بس ما ابعت ؟؟؟؟
اشتاتقلك
جانفي 16, 2010 في 11:04 م
دعدوشة
يبدو ان نسبة التخدير في المسلسلات التركية بدأ مفعولها بالتلاشي
فشل تلو فشل تلو فشل
جانفي 16, 2010 في 11:32 م
Bassam007
ليش ما شفتوا مسلسل فريندس مدبلج للعربي
دخيلك خلي هيدا الشعب يتفرج… ليش بالله عنا غير هيك شغلة..
نتفرج وبس
جانفي 17, 2010 في 2:51 ص
النورس
الخير لقدام .. بس عيش كتير بتشوف أكتر
جانفي 17, 2010 في 5:51 م
حمزة
كل شي وارد ..
بعدين لا تنسي إنو هيدول ولاد عمنا ونحن
بهالإيام عم نحاول نعزز صلات القرابة …
الله يكون بعون الشعب العربي شو بدو يتحمل ليتحمل
جانفي 18, 2010 في 12:41 ص
MAJD SYRIA
كل شي ممكن وغير مستغرب
جانفي 18, 2010 في 9:24 م
kenan phoenix
بدي قول مبروووووووووووك هذا الانجاز العظيم
هذه بداية عصر النهضة وعصر الليمون
سلامات الك
جانفي 20, 2010 في 9:53 م
نسمات الشام
السؤال يلي بيطرح حالو … أنو لأيمت بدنا نضل ناخد من غيرنا غرب او شرق بالوقت يلي ما عم نعطيهن شي , وللأسف ما عم ناخد منهن إلا كل شي بيخدر العقول وبموت القلوب ,والله يجرينا من بعد الهندي
تحياتي
جانفي 22, 2010 في 1:11 ص
مستر مهستر !
ومع انتشار البضائع الصينية التي غطت كل الأسواق وغزت كل المجالات …بامكانكم أن تنتظروا الصيني المدبلج ….
جانفي 22, 2010 في 2:56 ص
حسون الملعون
شو نسيتو ياشاطرين ؟؟؟ قلتو التركي والهندي وياحزركم شو بقي ؟؟؟؟
أكيد عجزتو !! بقي الحمصي ماخطر ببال حدى فيكم !! يلا تصبحو عا خير ..
جانفي 22, 2010 في 4:48 م
شمس
تصوروا ينعرض مسلسل عربي مدبلج بالإنكليزية على العالم الغربي… ليش لاء… بالحياة كل شي ممكن
جانفي 23, 2010 في 12:12 ص
الشاطر ماهر
ايه ……….. شو بدكن بالحكي ..ذكرتونا ب/ كساندرا /
عنجد من بعد المكسيكي مافي …بلا تركي بلا هندي …
جانفي 23, 2010 في 3:23 ص
واحد نعسان
ليش هيك الشعب العربي مابيعجبوا العجب ولا الصيام برجب
خلينا نشوف صبايا حلوين أمثال نور ولميس ….
فيفري 14, 2010 في 7:35 م
طالبة ثقافة
شـــــر البلية ما يضحك .. !!